ग्रामपंचायत पाल

परिचय

कोकणच्या निसर्गरम्य भूमीवर सिंधुदूर्ग जिल्हातील समुद्रकिनारी वसलेल्या वेंगुर्ले तालुक्यात पाल हे एक छोटेसे गाव आहे.
 
मौजे पाल हे वेंगुर्ला तालुक्यातील गांव असून ते वेंगुर्ला शहरापासून ९ कि.मी. अंतरावर आहे. निसर्गाचा वरदहस्त असलेले हे गाव ग्रामपंचायत, शाळा, कला, क्रीडा, शिक्षण, आरोग्य, वाहतूक, सार्वजनिक सोयी सुविधांनी परिपूर्ण आहे. गावामध्ये ऐतिहासिक स्थळे आहेत.

पाल गावातील जमीन ही काळी कसदार मृदा असणारी आहे. पाल ग्रामपंचायत कार्यक्षेत्रातील जमिनीचा वापर हा मुख्यत्वेकरुन शेतीसाठी केला जातो. पावसाळ्यात भात, नाचणी ही पिके घेतली जातात तर उन्हाळी हंगामात भाजीपाला लागवड, मिरची लागवड, भुईमुग लागवड केली जाते. तसेच आंबा, काजु, फणस, सुपारी, नारळ, केळी, कोकम ही बागायती पिकेही घेतली जातात. येथील लोकांचे शेती हे प्रमुख उत्पन्नाचे साधन आहे. काही लोक बागायतीमधून उत्पन्न मिळवतात.

गावात प्रदूषण नसून पाल गावाला सन २००९ मध्ये “निर्मल ग्राम पुरस्कार” प्राप्त आहे. पुरस्कार प्राप्त झाल्यानंतरही गावाने आपले निर्मल्य टिकवून ठेवले आहे. गावातील शाळा, अंगणवाडया यांना शौचालय व मुतारी सुविधा उपलब्ध आहे. गावामध्ये ‘संत गाडगेबाबा ग्रामस्वच्छता अभियान’ राबविले जाते. त्यातून लोकांना स्वच्छतेचे महत्त्व पटवून दिले जाते. शाळांमधून मुलांद्वारे स्वच्छतेचे संदेश घरोघरी पोहचविले जातात व अमलात आणले जातात. गावातील घनकचरा परसबागांमध्ये खत म्हणून वापरला जातो.